Дастаи “Истиқлол”-и Тоҷикистон дар рақобат бар муқобили тими “Ан-Наср”-и Арабистони Саудӣ, ки дар Варзишгоҳи марказии шаҳри Ҳисор доир шуд, ба бохти калон рӯ ба рӯ гардид.

Ин бозӣ дар доираи даври 5-уми Лигаи дуюми қаҳрамонҳои Осиё дар гурӯҳи “D” сурат гирифта, бо натиҷаи 4:0 ба фоидаи меҳмонон анҷом ёфт. Голҳои “Ан-Наср”-ро Жоау Феликс, Муҳаммад Симакан, Садио Мане ва Айман Яҳё заданд.

Сараввал, Жоау Феликс, ҳамлагари пуртуғолии дастаи арабӣ дар дақиқаи 12-ум аз ҷаримаи 11-метра ё пеналтӣ ҳисобро боз кард. Баъдан 5 дақиқа қабл аз поёни қисми аввали бозӣ Муҳаммад Симакан бори дуввум ба дарвозаи “Истиқлол” гол зад.

Садио Мане дар дақиқаи 84-ум бори сеюм ва Айман Яҳё дар дақиқаҳои иловагӣ (90+2) маротибаи чаҳорум дарвозаи истиқлолро рахна кард.

Пас аз ин бохт, мавқеи “Истиқлол” дар гурӯҳи “D” тағйир наёфт ва дастаи кишвари мо бо 6 хол дар зинаи сеюм боқӣ монд. Тими “Ан-Наср” баъди ин ғалаба шумораи имтиёзҳояшро ба 15 адад расонида, мавқеашро дар садри ҷадвали гурӯҳ қавӣ кард. Ин даста аллкай аз зинаи аввал ба даври ҳазфӣ (плей-офф) роҳхат гирифтааст.
1/3

Дар бозии дигари гурӯҳи “D” шаби гузашта дастаи “Аз-Завра”-и Ироқ дар майдони худ “Гоа”-и Ҳиндустонро бо ҳисоби 2:0 мағлуб кард. Ҳамин тариқ, ҳоло аз гурҳи “D” танҳо “Ан - Наср” ба давраи баъдӣ роҳ ёфтааст. Тақдири роҳхати дуюми гурӯҳи “D”  баъди анҷоми бозиҳои даври охир муайян мешавад.

Бодя гуфт, ки "Истиқлол" дар бозии қаблӣ аз "Ан-Наср" бо ҳисоби 5:0 мағлуб гашта буд. Ин дидор моҳи сентябр дар шаҳри Риёз баргузор гардид.

“Истиқлол” дар бозии охирини марҳилаи гурӯҳӣ рӯзи 24-уми декабр дар сафар бо “Гоа” мубориза мебарад. Дар ҳамин рӯз “Ан-Наср” дар майдони худ “Аз-Завра”-ро қабул мекунад.

Ягона имкони “Истиқлол” барои баромадан аз гурӯҳ пирӯзӣ дар баробари “Гоа” ва умед бар он аст, ки “Ан-Наср” дар рақобат бо “Аз-Завра” шикаст нахӯрад. Фарқияти голҳо (-7) вазъро душвор мегардонад, аммо тавозуни нерӯҳо ба "Истиқлол" имкон медиҳад, ки ба гирифтани роҳхати марҳилаи ҳазфӣ умедвор бошад.

Дар Telegram, Facebook ва Instagram бо мо бимонед.