Парвиз Умарбоев, футболбози тоҷик, нимҳимоятгари тими миллии футболи Тоҷикистон ва капитани тими “Локомотив”-и Булғористон соҳиби ҷоизаи баландтарин ин даста гардид. Тӯби ба дарвозаи ҳариф вориднамудаи ӯ “Голи сол” дониста шудааст.
Ин даста дар саҳифаи худ дар шабакаи иҷтимоӣ навиштааст, ки ин голро ӯ дар бозӣ бо "Спартак" (Варна) зада буд ва маҳз он ғалабаи дастаро таъмин кард.
Манбаъ менависад, ки парвиз Умарбоев кайҳо боз яке аз бозигарони калидии "Локомотив" ба шумор меравад, муҳаррики маркази майдон ва беҳтарин созандаи ҳамлаҳои даста аст. Ғайр аз ин,ӯ ба сафи беҳтарин бозигарони тамоми лигаи Булғористон, ки зиёд партобҳои головар анҷом додаанд, дохил мешавад.
"Ба туфайли бозии устувори футболбози тоҷик, "Локомотив" бо итминон дар гурӯҳи довталабон ба медалҳо ва дарёфти ҷой дар мусобиқоти аврупоӣ қарор дорад. Фосила аз ҷойи сеюм ҳамагӣ чор имтиёз аст ва ин чунин маъно дорад, ки мубориза акнун оғоз мешавад",- гуфтааст ин даста.
Парвиз Умарбоеви 31-сола зодаи шаҳри Хуҷанд буда, аз сатҳи як футболбози маҳаллӣ то бозингари сатҳи аврупоӣ расид.
Ӯ дар ҳунарнамоии касбии худба дарёфти Суперҷоми Тоҷикистон бо “Истиқлол” (соли 2015) ноил гардида, сипас ба Булғористон рафт.
Дар ин ҷо, ӯ бо дастааш ду маротиба соҳиби Ҷом (мавсимҳои соли 2018-10 ва 2019/20) ва Суперҷом (соли 2020) шуд. Тобистони соли 2025 даста муҳлати қарордод бо нимҳимоятгарро то моҳи июни соли 2027 дароз кард.
Ӯ аз соли 2015 инҷониб дар тими мунтахаби Тоҷикистон бозӣ мекунад ва яке аз бозигарони устувор ва калидии тимии миллӣ ба шумор меравад.
Сифатҳои пешсафии ӯ дар сатҳи даста низ таҷассум ёфта, бозии "Локомотив" маҳз атрофи ӯ сохта мешавад ва маҳз ӯст, ки дар бозиҳои пуршиддат ба тимаш рӯҳу илҳом мебахшад.
Руcский