Виталий Левченко, матахассиси 53-солаи тоҷик дигарбора сармуррабии тими “Истиқлол”-и Душанбе таъин шуд. Ҳамчунин, ситоди нави мураббиёни ин даста ҳам маълум шудааст. Дар ин бора бошгоҳи “Истиқлол” хабар дода, навиштааст, ки шартномаи ҳамкорӣ бо Левченко то анҷоми мавсими 2026 ба имзо расидааст.

Ҳамчунин, ба ситоди муррабиёни ин даста, Андрей Анненков, - мураббии калон, Анвар Норкулов - мураббии тайёрии ҷисмонӣ, Фаррух Бердиев – мураббии дарвозабонҳо ва Дониёр Муродов – мураббии таҳлилгар шомил гардиданд.

Бояд гуфт, Левченко қаблан низ роҳбарии тими “Истиқлол”-ро ба уҳда дошт (солҳои 2020-2022) ва бо роҳнамоии ӯ даста қаҳрамони Тоҷикистон гардида, кишварро дар Лигаи қаҳрамонҳои КФО намояндагӣ карда буд.
Ситоди нави мураббиёни ин даста
Акс аз дастаи "Истиқлол"

Ҳоло ӯ дар вазифаи сармураббии "Истиқлол" Игор Черевченкоро, ки моҳи декабри соли 2025 аз ин мақом канор рафта буд, иваз мекунад. Ин мутахассис аз моҳи октябри соли 2024 сармураббии “Истиқлол” буд.

Черевченко сабаби истеъфои худро ба ҷароҳати зонуяш рабт дода, гуфта буд, ки бояд дар Маскав ҷарроҳӣ шавад ва барои барқароршавӣ барояш аз 2 то 4 моҳ истироҳат лозим аст. Ҳамин тариқ, “Истиқлол” шартномаи ҳамкорӣ бо ҳамаи ситоди мураббиёни дастара тамдид накард.

Виталий Левченко соли 1972 дар шаҳри Хуҷанд ба дунё омадааст. Тарбиятдидаи мактаби маҳаллии футбол мебошад. Дар дастаҳои “Хуҷанд”, тимҳои украинии “Динамо” ва ССКА (Киев), “Таврия”-и Симферопол, дастаҳои русиягии “Волгар” (Астрахан), “Спартак” (Кострома), “Динамо” (Ставропол), “Урал” (Екатеринбург), ҳамчунин тими “Чанчун Ятай”-и Чин бозӣ кардааст. Дар ҳайати мунтахаби Тоҷикистон (1996-2000) дар 10 бозӣ ширкат кардааст.

Дастаҳои украинии “Княжа” (вилояти Бориспол), “Еднист” (вилояти Чернигов), “Десна” (Чернигов)-ро машқ дода, ба ҳайси ёвари сармураббии мунтахаби ҷавонони футболи Украина, ёвари сармураббии мунтахаби футболи Тоҷикистон, сармураббии мунтахаби футболи ҷавонони Тоҷикистон (U-19) буд.

Ҳамчунин, як муддат сармураббии дастаи “Барқчӣ”-и Ҳисор, мураббии тими русиягии “Криля Советов” (Самара) ва сармурабии бошгоҳи “Хуҷанд” буд. Баъди ин, ду сол - 2020-2022 сармарабби "Истиқлол"-и Душанбе буд. 

Виталий Левченко се мавсими охир дар тими “Нефтчӣ”-и Ӯзбекистон фаъолият дошт ва соли 2025 ҳамроҳ бо ин даста қаҳрамони футболи Ӯзбекистон шуд.

Дар Telegram, Facebook ва Instagram бо мо бимонед.