Душанбе. 8-уми июл. ОИ «Азия-Плюс» - Дар пойтахт оид ба таъмири асосии қисмати ғарбии роҳи мошингарди кӯчаи Н.Қаробоев (аз хиёбони Саъдии Шерозӣ то бурриши кӯчаи Ҷомӣ) ва сохтмони роҳи мошингард аз кӯчаи Камонгарон (Заводская) то назди бинои Воҳиди махсуси Вазорати корҳои дохилии ҶТ тендер баргузор мешавад.

Сухангӯи раиси шаҳри Душанбе Шавкат Саидов хабар дод, ки мутобиқи қарори раиси пойтахт корҳои таъмир дар асоси ҳуҷҷатҳои лоиҳавӣ ва харҷномавӣ бо хулосаҳои ташхиси Агентии сохтмон ва меъмории назди ҳукумати ҶТ иҷро мегарданд.

Бино ба иттилои манбаъ, мири шаҳр бобати ташкили комиссияи тендерӣ барои интихоби пудратчии асосии иҷрои корҳои сохтмонӣ ва ба зиммаи ин комиссия вогузор гардидани дар мӯҳлатҳои пешбинишуда омода сохтани санадҳои меъёрии ҳуқуқии амалкунанда ва ҷамъбасти тендер супориш додааст.

«Сарраёсати ободонии пойтахт чун фармоишгар вазифадор карда шудааст, ки бо риояи талабот ҳуҷҷатҳои заруриро барои гузаронидани тендер омода ва ба комисссияи тендерӣ пешниҳод намояд», - афзуд Ш.Саидов.