Душанбе. 16-уми июл. ОИ «Азия-Плюс» - Имрӯз дар шаҳри Душанбе мизи мудавар оид ба баррасии тарҳи Кодекси ахлоқи касбии рӯзноманигорон баргузор мешавад.

Чорабинии мазкурро иттиҳодияи ҷамъиятии «Иттилоот ва муошират» ва департаменти иттилооти вазорати корҳои хориҷии ҶТ созмон медиҳанд.

Ёдрас мекунем, ки дар мизи мудаввар инчунин лоиҳаи «Савганди рӯзноманигор» низ мавриди муҳокима қарор хоҳад гирифт. Дар лоиҳаи «Савганди рӯзноманигор» аз ҷумла гуфта мешавад, ки бо касби вазифаи рӯзноманигорӣ ва оғози фаъолият шаҳрванд бояд ҳамеша ва комилан масъулиятро назди ҷомеа ҳис намояд, ба муттаҳамкунии беасос, тақаллубкории санадҳо, таҳрифи далоил ва плагиат роҳ надода, танҳо он иттилоотеро пахш созад, ки ба эътимоднокии он мутмаин аст.

Моҳи феврали соли 2007 дар шаҳри Душанбе семинар ва тренинги дурӯза дар мавзӯи «Кодекси ахлоқи рафтори рӯзноманигор: меъёрҳои байнулмилалӣ ва масоили ахлоқи касбии рӯзноманигор дар Тоҷикистон» доир гардид.

Он замон рӯзноманигорон ба чунин хулосае расида буданд, ки Кодекси ахлоқ зарур аст, вале лоиҳа ҳам аз лиҳози шакл ва ҳам аз лиҳози мундариҷа коркарди ҷиддиро тақозо мекунад.