Душанбе. 18-уми июл. ОИ «Азия-Плюс» - Дар Токио собиқ президенти Бонки рушди Осиё (БРО) Тадао Чино дар синни 74-солагӣ аз олам даргузашт.

Сарёвари маъмурии намояндагии БРО дар Тоҷикистон Татяна Евстифеева ба ОИ «Азия-Плюс» хабар дод, ки Т.Чино пас аз таъин шудан ба мансаби президенти бонк, Стратегияи паст кардани сатҳи камбизоатиро роҳандозӣ сохта, онро яке аз ҳадафҳои асосии бонк қарор додааст.

Илова бар ин, таҳти роҳбарии Т.Чино соли 2000 Стратегияи БРО оид ба рушди бахши соҳибкории хусусӣ қабул гардида, сохтори бонк аз нав ташкил шудааст ва сиёсати ифтитоҳу ба роҳ мондани фаъолияти намояндагиҳои бонк дар кишварҳои гуногун муваффақона ба анҷом расидааст.

«Дар мақоми президенти бонк Т.Чино се маротиба аз Тоҷикистон боздид карда, ҳамроҳи сарвазири ҶТ Оқил Оқилов моҳи ноябри соли 2003 намояндагии БРО-ро дар Тоҷикистон расман ифтитоҳ намудааст», - изҳор дошт Т.Евстифеева.