Душанбе. 30-уми июл. ОИ «Азия-Плюс» - Ширкати рейтингии Фаронса « Planet Rating » аз фаъолияти «Бонки Эсхата» дар соли 2007 натиҷагирӣ намуд. Ба иттилои сомонаи расмии бонк, тибқи меъёрҳои байнулмилалӣ ба фаъолияти бонк баҳои баланд сазовор дониста шуда, он мӯътадил будани вазъи молиявӣ ва рушди мустақими бонкро нишон медиҳад.

Ба гуфтаи сариқтисодчии шӯъбаи тиҷорати байнулмилалии Бонк Масрур Эшонов, натиҷагирӣ мувофиқи усули GIRAFE баргузор шуд, ки дар он нишондиҳандаҳои тарзи идоракунӣ, ҳисобот, таъмини иттилоотӣ, хавфҳо ва молиягузорӣ (дараҷаи мӯътадилии таъмини молиявии амалиётҳои бонк) мавриди омӯзишу санҷиш қарор гирифтанд.

Дар иттилои бонк ҳамчунин гуфта мешавад, ки баргузории санҷиши рейтингӣ ба шаффофияти фаъолияти молиявӣ ва ҷалби сармоягузорӣ мусоидат кардааст.

Зикр мегардад, ки ин санҷиши дуввуми рейтинги бонк буда, соли гузашта ширкати Ҳиндустон MCRIL аз он натиҷагирӣ намуда буд.