Хуҷанд. 11-уми август. ОИ «Азия-Плюс» - Дар таъхир афтодани парвозҳо ба хатсайрҳои Русия рӯзҳои ахир терминали байнулмилалии Хуҷанд гунаҳкор нест.   Директори терминали якуми Ҷамъияти саҳомии кушоди «Нурафшон» Карим Аҳмедов ба мухбири ОИ «Азия-Плюс» изҳор дошт, ки шаби 7-ум ба 8-уми август парвози ҳавопаймо ба хатсайри «Хуҷанд-Маскав», ки онро Корхонаи воҳиди давлатии ҳавопаймоии «Тоҷикэйр» ба ӯҳда дорад, ба таъхир афтодааст. «Ҳудуди 170 нафар мусофирон шабро дар толори интизорӣ рӯз карданд, - гуфт ӯ. - Намояндагони ширкати ҳавопаймоӣ ба онҳо эътиборе надода, бо хӯрок таъмин накарданд ва иллати боздошти парвози ҳавопайморо ҳам касе ба онҳо шарҳ надод».

Чунин ҳолат 8-уми август зимни парвози ҳавопаймои хатсайри Хуҷанд Санкт-Петербург низ рух дод, ки парвози он аз соати 7-и субҳ то 7-и бегоҳ мавқуф гузошта шуд ва ин парвоз низ ба дӯши корхонаи «Тоҷик Эйр» вогузор гашта буд.

«Мусофирон ба роҳбарияти терминал арзу шикоят бурданд, вале гап сари он аст, ки мо ба иҷрои парвозҳои ҳавопаймоҳои мусофирбар масъул нестем, инро бояд ширкатҳои ҳавопаймоӣ ба анҷом расонанд, - гуфт К.Аҳмедов. - Дар навбати худ, мо кӯшиш ба харҷ медиҳем, ки сатҳи хизматрасониро баланд намоем ва бо дарназардошти ба таъхир афтодани парвозҳо мо дар терминал утоқҳои шустушӯӣ омода сохтем, то мусофирон аз он бемалол истифода баранд».

Аз терминал ҳамчунин иттилоъ доданд, ки парвозҳои ширкатҳои ҳавопаймоии Русия низ гоҳ-гоҳ ба таъхир меафтанд, вале ин он қадр назаррас нест.