Душанбе. 13-август. ОИ «Азия-Плюс» - Пагоҳ дар Душанбе конфронс таҳти унвони «Чораҳои ҳалли қарзҳои хоҷагиҳои пахтакор ва татбиқи стратегияи иттилоотии Комиссияи миллӣ» доир мегардад, ки дар он масъалаи роҳи ҳалли қарзҳои хоҷагиҳои пахтакор мавриди муҳокима қарор хоҳад гирифт.

Аз Маркази тадқиқоти стратегии назди президенти Тоҷикистон ба ОИ «Азия-Плюс» хабар доданд, ки дар конфронс намояндагони мақомоти марбутаи соҳаи пахтакорӣ оид ба мушкилоти соҳа, чораҳои андешида бобати пардохти қарз ва таъмини иттилоотии ислоҳоти соҳаи пахтакорӣ табодули назар хоҳанд кард.

Конфронсро Маркази тадқиқоти стратегии назди президенти Тоҷикистон бо дастгирии Барномаи рушди Созмони Милали Муттаҳид ва Агентии Канада оид ба рушди байнулмилалӣ созмон медиҳад.

Ёдрас мекунем, ки қарзи хоҷагиҳои пахтакор дар соли 2007 409 млн. доллари амрикоиро ташкил дод. Соли равон хоҷагиҳои деҳқонии пахтакор ба механизми нави сармоягузорӣ гузаштанд, яъне қарздиҳӣ бевосита тавассути бонкҳо сурат гирифт. Дар ҷумҳурӣ 34 ноҳияи пахтакор мавҷуд аст, ки 19-тои он дар вилояти Хатлон, 10-то дар вилояти Суғд ва 5-тои он дар ноҳияи тобеи марказ ҷойгир шудаанд.