Душанбе. 14-уми август. ОИ «Азия-Плюс» - Ёвари ҳамоҳангсози барнома оид ба офатҳои табиӣ дар Осиёи Марказӣ Имомбердӣ Бердов ба мухбири ОИ «Азия-Плюс» изҳор дошт, ки имрӯз аз ҷониби Раёсати Швейтсария оид ба рушд ва ҳамкорӣ дар доираи лоиҳаи « WAW » ба Тоҷикистон шаш беморхонаи сайёр дода мешавад.

Бино ба иттилои манбаъ, қувваҳои мусаллаҳи Швейтсария то соли 2010 бо лавозимоту таҷҳизоти нави тиббӣ муҷаҳҳаз карда мешаванд, аз ин рӯ қарор шудааст, беморхонаҳои сайёрро, ки дар шароити гуногун метавон онро истифода намуд, ба Тоҷикистон дода шавад.

Арзиши як беморхонаи сайёр 72,3 ҳазор франки швейтсариро ($66 ҳазор) ташкил дода, маблағи умумии кӯмаки гуманитарӣ ба 400 ҳазор доллари амрикоӣ баробар аст. Беморхонаҳои сайёр дар шаҳрҳои Душанбе, Хуҷанд, Қӯрғонтеппа, Хоруғ ва водии Рашт ҷойгир карда мешаванд.