Хуҷанд. 16-уми август. ОИ «Азия-Плюс» - Имрӯз дар шаҳри Хуҷанд бинои маркази эндокринологии вилоят ба истифода дода мешавад. Сардори раёсати тандурустии вилояти Суғд Ҷалил Тошматов ба хабарнигори ОИ «Азия-Плюс» изҳор дошт, ки чорабинии мазкур ба муносибати ҷашни Рӯзи коркунони тиб ба нақша гирифта шуда, бинои нав барои табобати 40 нафар беморон пешбинӣ гардидааст.

«Хишти аввали биноро моҳи апрели соли 2008 раиси вилоят Қоҳир Расулзода гузошта буд ва имрӯз он барои қабули беморон омода аст», - гуфт ӯ.

Мавсуф зикр кард, ки барои сохтмони бино аз буҷаи вилоят беш аз 600 ҳазор сомонӣ маблағ ҷудо карда шуд.

Имрӯз бахшида ба ҷашн ҳамчунин дар шаҳри Чкаловск маркази ташхисиву муолиҷавӣ ба фаъолият шурӯъ мекунад, ки дар он 30 нафар коркунони тиб бо ҷойҳои корӣ таъмин мегарданд.