Душанбе. 16-уми сентябр. ОИ «Азия-Плюс» - Дар ҷаласаи навбатии назоратии мақомоти шаҳрдории пойтахт раиси шаҳри Душанбе Маҳмадсаид Убайдуллоев аз кори муовини худ Абдуҳомид Шералиев ва директори Корхонаи воҳиди давлатии «Савдо ва бозорҳои шаҳри Душанбе» Асомиддин Ризоев изҳори норозигӣ намуд.

Сухангӯи раиси пойтахт Шавкат Саидов дар сӯҳбат бо хабарнигори ОИ «Азия-Плюс» изҳор дошт, ки М.Убайдуллоев барои муовинаш ва раиси корхона ҷиҳати ислоҳи камбудиҳо ва таъмини кофии бозорҳои пойтахт бо маҳсулоти ғизоӣ то 15-уми ноябр мӯҳлат муайян кард.

Бино ба иттилои манбаъ, дар ҷаласа ҳамчунин ҳисоботи шахсони масъули Сарраёсати ободонии шаҳри Душанбе шунида шуд. Масъулони сарраёсат ба ҳозирин дар бораи таҳияи нақшаи махсус оид ба ободонии пойтахт дар давраи солҳои 2008-2010 маълумот доданд.