Душанбе. 18-уми сентябр. ОИ «Азия-Плюс» -   Имрӯз дар «Кохи теннис»-и шаҳри Душанбе намоишгоҳи III -уми байнулмилалии «Зерсохтори иқтисоди Тоҷикистон-2008 ба кор шурӯъ мекунад, ки он то 20-уми сентябри идома хоҳад ёфт. Намоишгоҳ аз ҷониби ширкати ITECA Osiyo и I.T.E. E &C Ltd (Бритониёи Кабир) бо дастгирии ҳукумати ҷумҳурӣ, Палатаи савдо ва саноати Тоҷикистон, вазоратҳои энергетикаву саноат, нақлиёт ва коммуниктсия, рушди иқтисоду савдо, Саридораи геология ва Агентии сохтмон ва меъмории назди ҳукумати кишвар созмон дода шудааст.

Ҳангоми суханронӣ дар маросими ифтитоҳи он муовини аввали раиси Палатаи савдо ва саноати Тоҷикистон Одил сангов зикр кард, ки мавзӯи молу маҳсулоти пешниҳоднамудаи созмондиҳандагони намоишгоҳ ба талаботи замона созгор буда, ҷавобгӯи манфиатҳои иқтисоди Тоҷикистон аст.

Аз ширкати ITECA Osiyo и I.T.E. E &C Ltd ба ОИ «Азия-Плюс» хабар доданд, ки намоишгоҳ бо таҳияи консепсияи махсус баҳри муттаҳид сохтани робитаҳои ҳамкории истеҳсолкунандагони таҷҳизот, трейдерон, таъминкунандагони молу маҳсулот ва хизматрасонӣ ташкил гардидааст.

Дар намоишгоҳ ширкатҳо дастовардҳо ва навгониҳои худро дар бахшҳои мухталифи индустрия, аз ҷумла рушди зерсохтори иқтисод, фанновариҳои иттилоотӣ ва коммуникатсионӣ, энергетика, саноати истихроҷи маъданҳои кӯҳӣ ва металлургия ба маърази тамошо хоҳанд гузошт.

Бино ба иттилои манбаъ, дар намоишгоҳ молу маҳсулот асосан дар се самт ба тамошобинон пешкаш мегарданд - бахшҳои сохтмон, энергетикаву рӯшноидиҳӣ ва корҳои кӯҳӣ.

Дар бахши «Сохтмон» таҷҳизоти сантехника, дару тиреза, техникаи электрикӣ, нақлиётӣ ва масолеҳи сохтмону техникаи он, дар бахши «Энергетикаву рӯшноидиҳӣ» ва «Корҳои кӯҳӣ» таҷҳизоти электротехникӣ, насосҳову компрессорҳо, технологияҳои таъиноти ҳифзи табиат, мошинҳои борбардор, таҷҳизот аз гудохтаҳои дурушт ва ғайра намоиш дода хоҳад шуд.

Тибқи маълумоти сарчашма, дар намоишгоҳ молу маҳсулоти 16 ширкат аз 14 кишвари дунё, аз қабили Тоҷикистон, Эрон, Қазоқистон, Чин, Русия, Туркия ва давлатҳои дигар ба маърази тамошо гузошта хоҳанд шуд.