Хуҷанд. 18-уми сентябр. ОИ «Азия-Плюс» - Донишҷӯёни тамоми макотиби олӣ, коллеҷҳо ва мактабҳои миёнаи миёнаи махсуси вилояти Суғд муддати як моҳ ба деҳқонон дар ҷамъоварии ҳосили «тиллои сафед» ёрӣ хоҳанд расонд. Аз маркази таҳлиливу иттилоотии дастгоҳи раиси вилоят ба мухбири ОИ «Азия-Плюс» хабар доданд, ки дар ин хусус раҳбарияти муассисаҳои таълимӣ ва хоҷагиҳои деҳқонии пахтакори вилоят тавофуқ ҳосил кардаанд.

            Аз аввалинҳо шуда донишҷӯёни соли аввали таҳсили Донишкадаи металлургияи кӯҳии Тоҷикистон ба кӯмаки пахтакорони ноҳияи Бобоҷон Ғафуров шитофтанд ва донишҷӯёни муассисаҳои таълимии дигар то 22-уми сентябр ба пахтачинӣ сафарбар карда мешаванд. Ба пахтачинӣ донишҷуёни курсҳои 1,2 ва 3-ум ҷалб карда мешаванд, ки шумораи онҳо ба 6 ҳазор нафар баробар аст.

            Соли равон тибқи нақша кишоварзони вилоят бояд 172 ҳазору 100 тонна пахта ҷамъоварӣ намоянд. Феълан ба хирманҳо ҳамагӣ 14 ҳазору 466 тонна ҳосили пунбадона рехта шудааст, ки 8,41 дарсади нақшаи пешбинишударо ташкил медиҳад.