Хуҷанд. 27-уми сентябр. ОИ «Азия-Плюс» - Чанде қабл дар қаламрави масҷиди ҷомеи Шайх Муслиҳиддини вилояти Суғд сохтмони манораи дуюм шурӯъ гардид. Мудири мадрасаи исломӣ Ҳоҷӣ Орифҷон Байзоев дар сӯҳбат бо хабарнигори ОИ «Азия-Плюс» изҳор дошт, ки ҳамчунин дар як вақт сохтмони бинои нави мадраса низ оғоз мегардад.

Бино ба иттилои манбаъ, сохтмони манораро, ки баландиаш 21 метр аст, ширкати «Барс» ба ӯҳда гирифтааст. Бунёди мадраса аз ҳисоби маблағҳои хайрия ва дастгирии раиси вилоят Қоҳир Расулзода сурат хоҳад гирифт. Бинои мадраса ба ду қисм - занона ва мардона тақсим гардида, дар он дар як вақт беш аз 120 нафар толибилмон таҳсил хоҳанд кард. Айни замон дар мадраса 70 духтар ва 65 писар таҳсил мекунанд.

            «Сохтмони манора ва мадраса охири соли 2009 ба анҷом хоҳад расид ва дар ин кор шитоб кардан лозим нест, зеро чунин иншоот аҳамияти таърихӣ доранд», - афзуд О.Байзоев.