Душанбе. 29-уми сентябр. ОИ «Азия-Плюс» - Имрӯз дар мулоқоти муовини аввали раиси Палатаи савдо ва саноати Тоҷикистон Одил Сангов бо намояндаи ширкати «Абхиҷит групп»-и Ҳиндустон Нитеш Банерҷи масоили ҳамкории дуҷониба, аз ҷумла таъсиси корхонаҳои муштарак мавриди баррасӣ қарор гирифтанд.

Аз Палатаи савдо ва саноати Тоҷикистон ба ОИ «Азия_плюс» хабар доданд, ки намояндаи ширкати ҳиндӣ изҳор доштааст, ки онҳо бо мақсади ҷустуҷӯи шарикон дар кори ба роҳ мондани тиҷорат ва фаъолият дар Тоҷикистон ба ин ҷо омадаанд ва омодаанд, пешниҳодотро оид ба сармоягузорӣ дар соҳаҳои энергетика, металлургия, сохтмони роҳҳо, саноати истихроҷи маъдан ва ғайра муҳокима намоянд.

Бино ба иттилои манбаъ, дар нимаи дуввуми рӯз намояндаи ширкат бо мақомоти роҳбарии Вазорати рушди иқтисод ва савдои Тоҷикистон дидору гуфтушунид хоҳад кард. Қобили зикр аст, ки «Абхиҷит» групп» яке аз ширкатҳои бузурги Ҳиндустон буда, доираи фаъолияташ бахшҳои гуногунро дар бар мегирад.