Кӯлоб. 30-уми сентябр. ОИ «Азия-Плюс» - Демократҳо ва коммунистони шаҳри Кӯлоб қарор карданд, ки дар интихобот ба маҷлиси вакилони халқи шаҳри Кӯлоб иштирок накунанд.  

Амрохон Сафаров, раиси созмони минтақавӣ ва шаҳрии Ҳизби Демократи Тоҷикистон (ҲДТ) дар Кӯлоб, ҷиноҳи М.Собиров мегӯяд, «демократҳо ба шаффофият ва ростии низоми интихоботӣ эътимод надоранд ва бо дастони худ қонунияти дар амал мавҷуднабудаи интихоботро тасдиқ карданӣ нестанд». А.Сафаров ҳамчунин иброз дошт, ки онҳо ният доранд, намояндаи худро аз ҳайати комиссияи интихобот низ бозхонд кунанд.

Котиби аввали кумитаи минтақавӣ ва шаҳрии Ҳизби Коммунисти Тоҷикистон дар Кӯлоб Шариф Сафаров мӯътақид аст, ки онҳо дар маҷлиси шаҳрӣ панҷ ҷой доранд ва ин миқдор кифоя аст, ки дар маҷлис баррасии баъзе масоилрор пешниҳод кунанд. «Аксариятро дар маҷлис, ки аз 40 нафар иборат аст, мо бе ин ҳам соҳиб шуда наметавонем», - гуфт ӯ.