Душанбе. 30-уми сентябр. ОИ «Азия-Плюс» - Пахтакорони ҷумҳурӣ ба нисфи марраи ҷамъоварии ҳосил наздик мешаванд. Аз Вазорати кишоварзии ҷумҳурӣ ба ОИ «Азия-Плюс» хабар доданд, ки деҳқонон аз майдонҳои кишти пунбадона беш 234 ҳазор тонна ҳосил ҷамъоварӣ кардаанд, ки 42,4 дарсади нақшаи пешбинишудаи   (552 ҳазору 500 тонна) соли ҷориро ташкил медиҳад.

Ба иттилои манбаъ, дар маъракаи ғунучини ҳосили пахта кишоварзони вилояти Хатлон пешсафанд, ки то имрӯз 175 ҳазору 243 тонна ё худ 52,8 дарсади ҳосилро ҷамъоварӣ кардаанд.

Пахтакорони вилояти Суғд - беш аз 42 ҳазор тонна ё худ 24,4 дарсад ва ноҳияҳои тобеи марказ - 17 ҳазор тонна ё худ 34,7 дарсади ҳосили пунбадонаро ҷамъоварӣ намудаанд. Дар ҷумҳурӣ ҷамъоварии ҳосили пахта идома дорад.