Душанбе. 2-юми октябр. ОИ «Азия-Плюс» - Бонки рушди Осиё мегӯяд, ки тарҳи бозсозии роҳи Душанбе-Қӯрғонтеппа-Данғара-Кӯлоб, ки марказро бо ҷануби Тоҷикистон мепайвандад, поён ёфтааст.

Тибқи иттилоъи манобеъи ин бонк дар Душанбе, дар чорчӯби ин лоиҳа ҳудуди 104 километр роҳи мошингард дар масири Душанбе-Қӯрғонтеппа ва аз маркази вилояти Хатлон то шаҳрҳои Данғара ва Кӯлоб бозсозӣ шудааст.

Бонк ин тарҳро ба маблағи ҳудуди 21 миллион, давлати Тоҷикистон ба маблағи 2,5 миллион ва Сандуқи ОПЕК дар ҳаҷми ҳудуди чаҳор миллион доллари амрикоӣ сармоягузори кардаанд.

Тибқи иттилоъи ин манбаъ, ҳадаф аз иҷрои ин тарҳ танҳо бозсозии роҳ набуда, балки аз ин тариқ ба коҳиши мизони фақр ва беҳбуди вазъи иқтисодии сокинони манотиқ перомуни ин роҳ мусоъидат шудааст.

Ҳамчунин, интизор меравад ин роҳ ба тавсеъаи бахши кишоварзӣ дар ҷануби Тоҷикистон мусоъидат кунад. Зеро, ҳамакнун шароити интиқоли коло ва маҳсулоти кишоварзӣ аз ин манотиқ ба бозорҳои дигар беҳтар шудааст.