Кӯлоб. 2-юми октябр. ОИ «Азия-Плюс» - Ҳизби наҳзати исломии Тоҷикистон (ҲНИТ) қарор кардааст, ки дар интихоботи маҷлиси вакилони халқи шаҳри Кӯлоб як номзад гузорад.

            Роҳбари созмони ҲНИТ дар шаҳри Кӯлоб Маҳмадшариф Набиев дар сӯҳбат бо хабарнигори ОИ «Азия-Плюс» изҳор дошт, ки миёни интихобкунадагон намояндаи мо дар ҳавзаи интихоботии рақами 1             аз обрӯву нуфузи зиёд ва эҳтироми сокинон бархӯрдор аст ва аз ин рӯ, ба хулосае расидем, ки номзадии ӯро пешниҳод созем. «Аз рӯи натиҷаҳои маъракаҳои интихоботи пешин мо огаҳем, ки онҳо на ҳамеша адолатнок сурат мегирифтанду аз чӣ бошад, ки нисбат ба ҲНИТ муносибати ғаразҷӯёна зоҳир мегардид ва ҳарчанд дар ҳавзаҳои интихоботие, ки номзадҳои ҳизби мо аз номзадҳои Ҳизби Халқии Демократии Тоҷикистон як сару гардан боло бошанд ҳам, дар натиҷа ба мағлубият дучор мегаштем», - гуфт ӯ ва афзуд, ки ҳизб умедвор аст, ин дафъа кор ранги дигар хоҳад гирифту дар маҷлиси вакилони халқи шаҳри Кӯлоб ҳизб намояндаи худро хоҳад дошт.