Душанбе. 11-уми октябр - Мақомоти Вазорати маорифи Тоҷикистон эълом доштаанд, ки дар саросари ин кишвар ба корҳои парвариш ва ҷамъоварии ҳосили пахта ҷалб кардани шогирдони мадорис қатъан манъ аст.

Ҳамзамон, таъкид шудааст, ки донишҷӯёни бархе аз муассисоти таҳсилоти олии Тоҷикистон метавонанд дар зарфи як моҳи тирамоҳ довталабона дар ҷамъоварии пахта дар саҳроҳо ширкат кунанд.

Фарҳод Раҳимов, муовини аввали вазири маорифи ҷумҳурӣ дирӯз дар як нишасти хабарӣ гуфт, ки ин вазорат аз ниҳодҳои додситонии ин кишвар хостааст, то аз мавориди ҷалби иҷбории шогирдони мадорис ба ҷамъоварии пахта ҷилавгирӣ кунанд.

Ин дар ҳолест, ки бар асоси гузоришҳои расида аз вилояти Суғд ва Хатлон дар ин манотиқ ҳанӯз мавориди фаровони истифода аз шогирдони мадорис дар корҳои ҷамъоварии пахта ба мушоҳида расидааст.

Оқои Раҳимов ба навбаи худ таъкид кард, ки раҳбарони хоҷагиҳо танҳо пас аз анҷоми дарсҳо ва дар рӯзҳои таътил ҳаққи ҷалби шогирдон ба ҷамъоварии пахтаро доранд ва дар ғайри ин сурат ин афрод муҷозот хоҳанд шуд.

Аз сӯйи дигар, масъулони вазорат хабарҳои мабнӣ бар истифода аз нерӯи донишҷӯён дар корҳои кишоварзиро таъйид карда, вале гуфтанд, ки ин амр фақат бо хоҳиши донишҷӯён анҷом шудааст.