Душанбе. 14-уми октябр. ОИ «Азия-Плюс» - Имрӯз дар Душанбе озмуни «Муаллими сол» оғоз мегардад.

            Тавре аз Вазорати маорифи ҷумҳурӣ ба ОИ «Азия-Плюс» хабар доданд, дар озмуни мазкур 8 нафар ғолибони озмунҳои минтақавӣ иштирок мекунанд.    

              Ширкаткунандагони озмун дар бахшҳои гузаронидани дарс, аз рӯйи ихтисос, таҳияи нақшаи гузаронидани он, пешниҳод намудани дараҷаи эҷоди худ, кор бо компютер ва маҳорати баргузории соати тарбиявӣ бо ҳам қувваозмоӣ менамоянд.

Ғолиби озмун соҳиби мукофоти пулӣ ба маблағи 2 ҳазор сомонӣ мешавад. Соли гузашта омӯзгори забони англисии литсеи рақами 55-и шаҳри Душанбе муаллими беҳтарини сол дониста шуд.

            Баргузор намудани чунин озмунҳо барои баланд бардоштани сатҳи дониши омӯзгорони макотиби таҳсилоти умумӣ ва дар ин замина ба бедор кардани ҳисси муҳаббат ва завқи онҳо нисбат ба касби пурифтихори омӯзгорӣ мусоидат мекунад.