Душанбе. 14-уми октябр. ОИ «Азия-Плюс» - Шабакаи давлатии телевизиони «Сафина»-и Тоҷикистон ба ҷамъияти саҳомӣ табдил мегардад.

Дар мусоҳиба бо хабарнигори ОИ «Азия-Плюс» директори шабака Маҳмадсаид Пиров изҳор дошт, ки ба оиннома ва муқаррароти шабакаи телевизионии «Сафина» тағйироти мувофиқ дар ин робита ворид карда шуданд ва тартиботи минбаъдаи табдили он ба ҷамъияти саҳомӣ дар доираи қонунҳои амалкунанда дар Вазорати адлияи ҷумҳурӣ сурат хоҳад гирифт.

«Соли равон барои фаъолияти шабака аз буҷаи ҷумҳурӣ 3 млн. сомонӣ маблағ ҷудо гардид, вале барои таъсиси як шабакаи телевизионии муосир ин миқдор маблағ басанда нест», - гуфт ӯ.

М.Пиров афзуд, ки дар сурати ба ҷамъияти саҳомӣ табдил гардидани шабака, имкон пайдо мешавад, ки рушди босуръати он таъмин гардида, сифати барномаҳо беҳтар ва музди меҳнати кормандони он зиёд карда шавад.