Душанбе. 16-уми октябр. ОИ «Азия-Плюс» - Рӯзи 20-уми октябри соли ҷорӣ дар шаҳри Маскав дар доираи татбиқи Барномаи вижаи Созмони Милали Муттаҳид (СММ) барои иқтисоди кишварҳои Осиёи Марказӣ (СПЕКА) ва ҷаласаи раҳбарияти шӯрои он дар мавзӯи «Шарикӣ дар соҳаи сармоягузорӣ барои таҳкими ҳамкории иқтисодӣ ва ҳамгиройӣ дар Осиёи Марказӣ» ҳамоиши иқтисодӣ баргузор мешавад.

            Тавре аз Вазорати рушди иқтисод ва савдои ҷумҳурӣ ба ОИ «Азия-Плюс» хабар доданд, дар ҷаласаҳои ҳамоиш намояндагони кишварҳои Осиёи Марказӣ ва Русия - тоҷирону сиёсатмадорони маъруф, иқтисодчиёни созмонҳои байнулмилалӣ ва ниҳодҳои молиявӣ масоили дурнамои рушди зерсохтори нақлиёт, соддакунии тартиботи убури марзҳо, истифодаи босамару оқилонаи захоири энергетикӣ ва обии минтақаи Осиёи Марказӣ, роҳу воситаҳои ба бозорҳои ҷаҳонӣ баровардани молу маҳсулот ва ашёи хом ва бозсозии корхонаҳои саноатӣ бо мақсади таъсиси ширкатҳои байнулмилалии рақобатпазирро мавриди баррасӣ қарор медиҳанд.

            Дар кори ҳамоиш роҳбарони як қатор вазорату идораҳои марбутаи кишварҳои Тоҷикистон, Қирғизистон, Туркманистон, Қазоқистон, Ӯзбекистон, Русия, намояндагони доираҳои тиҷоратӣ, мансабдорони воломақоми СММ ва созмонҳои байнулмилалӣ ширкат хоҳанд варзид.