Душанбе. 24-уми октябр. ОИ «Азия-Плюс» - Раиси шаҳри Душанбе Маҳмадсаид Убайдуллоев ҳайати бародаршаҳри Душанбе - шаҳри Санкт-Петербурги Русияро таҳти сарварии раиси Кумитаи шуғли аҳолии ҳукумати ин шаҳр Павел Панкратов ба ҳузур пазируфт.

Тавре сухангӯи раиси пойтахт Шавкат Саидов ба ОИ «Азия-Плюс» хабар дод, дар мулоқот масоили ҳамкориҳо дар соҳаҳои иқтисодиву иҷтимоӣ мавриди баррасӣ қарор гирифта, ба мушкилоти ҳифзи ҳуқуқ ва будубоши муҳоҷирони меҳнатии тоҷик дар шаҳри Санкт-Петербург таваҷҷӯҳи хос зоҳир карда шуд.

Бино ба иттилои манбаъ, П.Панкратов пешниҳод кардааст, ки дар чаҳорчӯбаи таҷлили ҷашни 10-солагии бародаршаҳр гаштани шаҳрҳо соли оянда дар пойтахти Тоҷикистон Рӯзҳои шаҳри Санкт-Петербург ва минбаъд Рӯзҳои Душанбе дар ин шаҳр гузаронида шуда, чунин чорабинӣ мунтазам доир гардад. Ин пешниҳод аз тарафи М.Убайдуллоев ҳамаҷониба дастгирӣ ёфт.