Душанбе. 30-уми октябр. ОИ «Азия-Плюс» - Дар як нишасти матбуотӣ муовини раиси мақомоти иҷроияи шаҳри Душанбе Рустам Раҳматов изҳор дошт, ки Маркази барқу гармидиҳии пойтахт аз 1-уми ноябри соли ҷорӣ ба кор шурӯъ мекунад.

            Ба қавли ӯ, дар марҳилаи аввал марказ ҳамарӯза 2,5 млн. кВт/соат нерӯи барқ ва 650 гигакалорий гармӣ истеҳсол хоҳад кард. «Корхона қодир аст, ки наздик ба 1 ҳазору 300 бинои шаҳрро бо гармӣ ва оби гарм таъмин созад, ки ин 34,9 дарсади миқдори умумии биноҳои пойтахтро ташкил медиҳад», - гуфт ӯ ва афзуд, ки соли гузашта 950 адад бино бо гармиву оби гарм таъмин буданд.

            Р.Раҳматов мегӯяд, мушкилоти асосии корхона дар норасоии гази табиӣ аст ва коршиносони Русия пас аз санҷиш истифодаи сӯзишвории омехта аз ангишт ва обро тавсия додаанд, ки аз ҷиҳати экологӣ безарар аст. «Ширкати «Барқи тоҷик» бо яке аз корхонаҳо Русия оид ба дастрасии технологияи истеҳсоли чунин сӯзишворӣ қарордод баст ва ояндаи наздик ин таҷҳизотии технологии ҷадид ба марказ оварда мешавад», - гуфт ӯ.

            Зикр гардид, ки айни замон марказ бо сӯзишвории мазут кор мекунад, ки захираи он 20 ҳазор тоннаро ташкил медиҳад.