Душанбе. 3-юми ноябр. ОИ «Азия-Плюс» - Дар хоҷагиҳои кишоварзии ҷумҳурӣ кишти тирамоҳии зироатҳои кишоварзӣ босуръат идома дорад. Тибқи нақша, имсол бояд дар майдони 238 ҳазору 800 гектар   шудгори тирамоҳии заминҳои кишти ғалладона, картошка ва сабзавот гузаронида шавад.   То имрӯз дар ҷумҳурӣ 59226 гектар шудгори тирамоҳӣ гузаронида шудааст, ки 24,8 фоизи нақшаро ташкил медиҳад.

              Кишти тирамоҳии зироатҳои ғалладона имсол дар ҷумҳурӣ дар майдони 229 ҳазору 500 гектар гузаронида мешавад. То имрӯз бошад, дар майдони 50856 гектар гузаронида шудааст, ки 22,2 фоизи нақшаро ташкил медиҳад.   Инчунин дар майдони 50511 гектар кишти тирамоҳии   гандум гузаронида шудааст.

          Тибқи нақша дар ҷумҳурӣ дар 170 000 гектар заминҳои обӣ кишти тирамоҳӣ гузаронида мешавад. То имрӯз дар майдони 50696 гектар заминҳои обӣ кишти тирамоҳии картошка ва дигар сабзавотҳо гузаронида шудааст.  

          Дар вилояти Суғд кишти тирамоҳии зироатҳои ғалладона, махсусан гандум хуб ба роҳ монда шудааст. Дар вилоят то аввали моҳи ноябр дар майдони 29269 гектар кишти тирамоҳии гандум гузаронида шудааст, ки 42,5 фоизи нақшаро ташкил медиҳад. Дар вилояти Хатлон низ   дар майдони 17146 гектар кишти тирамоҳии гандум гузаронида шудааст.

           Кишти тирамоҳии зироатҳои ғалладона, картошка ва сабзавот дар ҷумҳурӣ босуръат давом дорад. Дар ин бора аз маркази матбуот ва иттилооти Вазорати кишоварзии ҷумҳурӣ хабар доданд.