Душанбе. 12-уми ноябр. ОИ «Азия-Плюс» - Ширкати «Тетис Петролеум» эълом дошт, ки ҷиҳати дастрас кардани таҷҳизоти пармакунӣ ва корҳои дигар дар конҳои газу нафт бо корхонае ба мувофиқа расидааст.

            Тавре ноиби президенти ин ширкат оид ба робита бо сармоягузорон Сабин Росси ба ОИ «Азия-Плюс» хабар дод, таҷҳизоти мазкур аз дастгоҳи пармакунӣ, дастгоҳ барои таъмири асосӣ, дастгоҳи кафшергарӣ барои сохтмони лӯлаҳо, кранҳо, мошинҳои боркаш ва ғайра иборат аст.

            Ба қавли ӯ, ин таҷҳизот барои истифода дар корҳои иктишофиву ҷустуҷӯии конҳои нафту газ дар Тоҷикистону Қазоқистон пешбинӣ гардида, ба кам шудани хароҷот ва беҳбуди суръати корҳо мусоидат хоҳад кард.

            Номбурда афзуд, ки маблағҳои сармоягузории ширкат дар марҳилаи аввали фаъолият дар Тоҷикистон 8 млн. доллари амрикоиро ташкил медиҳанд.