Душанбе. 2-юми   декабр -   Ҷамъияти саҳомии кушоди «Бонки Эсхата» ояндаи наздик ният дорад, дар ҷумҳурӣ боз 5 шӯъбаи нав боз намояд. Дар ин бора ба ОИ «Азия-Плюс» аз бонки мазкур хабар доданд.

Дар ҳамин ҳол АМИТ «Ховар» хабар медиҳад, ки ба   таъсиси   бонки «Эсхата» 14   сол   пур   шуд. Раиси бонк   Хуршед   Носиров   дар   ҷараёни   ҷамъомади ботантанаи   ба ин муносибат баргузоргардида изҳор   намуд, ки   бонки   «Эсхата»   нахустин    бонки   тиҷоратии   Тоҷикистон   буда,   барои рушди   тиҷорати   хурду   миёна   дар   мамлакат   нақши   муҳим   мебозад.

Бонк   соли   аввали   таъсис ёфтанаш   ҳамагӣ   24    мизоҷ   дошт,   ҳоло    кормандони он   ба    бештар аз   12   ҳазор   нафар   тоҷирону   соҳибкорон   хизмат   мерасонанд. Қариб   80   фоизи   маблағи   қарзи   бонк   барои рушди   тиҷорат сарф   карда   мешавад.          

Бонки «Эсхата»   дар   натиҷаи   ҷорӣ   кардани хизматрасониҳои   иловагӣ,   беҳтар   кардани   сифати он,   кушодани   филиалҳои   нав    дар   минтақаҳои   гуногуни   мамлакат,   такмили   низоми   идорӣ,    истифодаи   технологияҳои   иттилоотӣ ва   воситаҳои   нави   техникӣ   ба   натиҷаҳои   калон ноил   гардид. Айни   ҳол дар   вилояти   Суғд   6   филиали   бонк,   дар   қисмати   ҷанубии   мамлакат   ду   филиали он ва   дар   саросари   ҷумҳурӣ   бештар аз 100   бунгоҳи   ҳаволаи пул    фаъолият   доранд.