Душанбе. 2-уми декабр. ОИ «Азия-Плюс» - Дирӯз дар шаҳри Маскав Ҳамоиши III -уми ВАО-и миллии кишварҳои узви Иттиҳоди Давлатҳои Мустақил ва Балтика ба кор шурӯъ кард.

Тавре аз Иттифоқи журналистони Тоҷикистон ба ОИ «Азия-Плюс» хабар доданд, кишвари моро дар ин ҳамоиш директори генералии ҶДДМ «Азия-Плюс» Умед Бобохонов, котиби масъули Иттифоқи журналистони Тоҷикистон Пӯлод Нуров ва дигарон намояндагӣ мекунанд.

Ба иттилои манбаъ, ҳамоиш аз ҷониби Оҷонсии иттилоотии «РИА Новости»-и Русия дар ҳамдастӣ бо Бунёди байнулмилалии ҳамкории гуманитарӣ созмон дода шуда, он то 3-уми декабри идома меёбад.

Зикр гардид, ки дар кори ҳамоиш намояндагони ВАО-и маъруфи кишварҳои Озарбойҷон, Арманистон, Белорус, Гурҷистон, Қазоқистон, Қирғизистон, Молдова, Туркманистон, Ӯзбекистон, Украина, Эстония ва ҳамчунин коршиносону муҳаққиқони ин соҳа ширкат мекунанд. Қобили зикр аст, ки ҳамоиши нахустин соли 2006 дар шаҳри Маскав баргузор шуда буд.