Душанбе. 3-юми декабр. ОИ «Азия-Плюс» - Мақомоти раҳбарии Ҷамъияти саҳомии кушоди «Нерӯгоҳи Сангтӯда-1» аз ширкати «Барқи тоҷик» дархост кардааст, ки маблағи қарз барои нерӯи барқи гирифтаашро пардохт намояд.

Тавре директори генералии нерӯгоҳ Раҳматулло Алжанов ба ОИ «Азия-Плюс» хабар дод, қарзи ширкати «Барқи тоҷик» ба нерӯгоҳ 21,4 млн. сомониро ташкил медиҳад (беш аз $6 млн).

Номбурда қайд кард, ки то 31-уми декабри соли ҷорӣ арзиши 1 кВт/соат барқи нерӯгоҳи «Сангтӯда-1» ба 1,15 сент баробар аст. «Аз 1-уми январи соли оянда арзиши он то 3,1 сент боло меравад», - гуфт ӯ.

Дар ҳамин ҳол, муяссар нашуд, ки аз ширкати «Барқи тоҷик» оид ба шарҳи ин масъала маълумоте дастрас гардад.

Маълумотнома: Нерӯгоҳи обию барқии «Сангтӯда-1» бо ғунҷоиши 670 МВт дар 100 километрии ҷануби шаҳри Душанбе ҷойгир шудааст. Лоиҳаро ба таври муштарак Тоҷикистону Русия амалӣ месозанд. Мувофиқи созишномаи байниҳукуматии Тоҷикистону Русия 75%-и саҳмияҳои нерӯгоҳ ба Русия ва 25%-и он ба Тоҷикистон тааллуқ доранд. Дар таърихи 30-уми ноябр ҳисобкунакҳои нерӯгоҳ истеҳсоли нахустин миллиард кВт/соати нерӯи барқро сабт намуданд.