Кӯлоб. 4-уми декабр. ОИ «Азия-Плюс» - Раёсати минтақавии Агентии «Тоҷикстандарт» дар Кӯлоб аз пагоҳ барои соҳибкорони 6 ноҳияи минтақа баргузории як силсила семинарҳои омӯзиширо оғоз мекунад.

            Тавре сардори раёсат Рустам Неъматов ба ОИ «Азия-Плюс» хабар дод, дар се моҳи гузашта пас аз қабули мораторияи дусола ба тафтиши сохторҳои соҳибкории хурду миёна на ҳамаи соҳибкорон моҳияти онро ба хубӣ дарк кардаанд. «Чанде хаёл карданд, ки акнун ба ҳама кор даст задан мумкин аст, вале воқеият бозгӯи он аст, ки дар ин самт амал кардан зарур аст», - гуфт ӯ.

            Ба гуфтаи ӯ, соҳибкоронро лозим аст, акнун вазифаҳои назоратиро ба зиммаи худ гиранд, то аз сифати маҳсулот ва сатҳи хизматрасонии онҳо шаҳрвандон шикоят надошта бошанд. «Аз ин рӯ, лозим аст, ки дар ин ду сол ҳисси масъулият ба зиммаи худи соҳибкорон вогузор гардад ва семинарҳои омӯзишӣ маҳз бо ҳамин мақсад гузаронида мешаванд», - афзуд Р.Неъматов.