Душанбе. 4-уми декабр. ОИ «Азия-Плюс» - Субҳи имрӯз иҷрокунандаи вазифаи раҳбари намояндагии Хадамоти муҳоҷирати Вазорати умури дохилии Тоҷикистон дар Русия Раҷабалӣ Ҳасанов тариқи телефон ба ОИ «Азия-Плюс» хабар дод, ки талаби муҳоҷирони тоҷик оид ба пардохти музди меҳнат дар зарфи ду-се рӯзи наздик қонеъ карда мешавад. Ёдовар мешавем, ки муҳоҷирони тоҷик муддати чандест, ки бо ин талаб дар шаҳри Екатеринбурги Русия даст ба корпартоӣ задаанд.

Ба гуфтаи ӯ, додситонии шаҳри Екатеринбург аз рӯи ин далел тафтишотро оғоз кардааст. Ӯ мегӯяд, ки муҳоҷирони тоҷик барои напардохтани музди меҳнати семоҳа аз ҷониби ширкати сохтмонӣ даст ба корпартоӣ задаанд. Мақомоти давлатии назорати меҳнати Русия метавонад ширкати сохтмониро ҷаримабандӣ намояд ё ба муддати 90 рӯз фаъолияти онро қатъ созад.

Р.Ҳасанов таъкид сохт, ки ҳалли мушкилоти муҳоҷирони тоҷик ҳамеша дар маркази таваҷҷӯҳи намояндагии Хадамоти муҳоҷирати ҷумҳурӣ дар Русия қарор дорад.