Хуҷанд. 5-уми декабр. ОИ «Азия-Плюс» - Додгоҳи низомии гарнизони вилояти Суғд ду сарбозро барои дароз кардани мӯҳлати рухсатӣ шартан аз озодӣ маҳрум намуд.

            Тавре додрас Муслим Худойбердиев ба ОИ «Азия-Плюс» хабар дод, дар мурофиаи додгоҳие, ки 3-уми декабр ба анҷом расидааст, зодаи ноҳияи Ашт Хуршед Абдураҳмонов ва сарбози дигар аз ноҳияи Конибодом дар ноҳияи Рашт хизмат карда, мӯҳлати рухсатии худро ғайриқонунӣ дароз мекунанд. «Масалан, Х.Абдураҳмонов ба ҷойи 10 рӯз 29 рӯз истироҳат кардааст», - гуфт манбаъ.

            Ба иттилои мнбаъ, додгоҳ онҳоро барои чунин амал шартан ба муддати як сол ва мӯҳлати озмоишӣ ба ҳамин мӯҳлат аз озодӣ маҳрум кардааст. «Мӯҳлате, ки онҳо ба замми рухсатӣ истироҳат кардаанд, ба мӯҳлати хизмат ҳисобида нахоҳад шуд», - афзуд сарчашма.