Душанбе. 9-уми декабр. ОИ «Азия-Плюс» - Дар моҳҳои январ-октябри соли ҷорӣ дар муқоиса ба ҳамин давраи соли гузашта нархҳои истеъмолӣ дар Тоҷикистон ба андозаи 30,7 дарсад афзудаанд, ки миёни кишварҳои узви ИДМ ин нишондиҳандаи баландтарин аст. Дар ин бора Кумитаи омори Иттиҳоди Давлатҳои Мустақил маълумот медиҳад.

            Нишондиҳандаи мазкур дар кишварҳои дигари узви ИДМ тариқи зайл аст: Украина – 25,8, Қирғизистон – 25,7, Озарбойҷон – 21,6, Қазоқистон – 18,7, Белорус – 15, Русия – 14,2 ва Молдова – 13,8 дарсад. Мизони пасттарини афзоиши нархҳои истеъмолӣ дар Гурҷистон (10,9дарсад) ва Арманистон – (9,6 дарсад) ба мушоҳида расидааст.

            Қобили зикр аст, ки маълумоти Кумитаи омори ИДМ ба маълумоти мақомоти омори кишварҳо мутобиқат намекунад. Масалан, тибқи маълумоти мақомоти омори кишварҳо тайи 10 моҳи соли равон афзоиши нархҳои истеъмолӣ дар Тоҷикистон - ҳамагӣ 13,1, Украина – 18, Қирғизистон – 16,6 ва Озарбойҷон – 15,7 дарсадро ташкил додааст.