Душанбе. 10-уми декабр. ОИ «Азия-Плюс» - Тайи ду ҳафтаи ахир мизони оби обанбори бузургтарини кишвар – Норак ба андозаи 1 метр зиёдтар шудааст. Қобили зикр аст, ки тибқи маълумоти ширкати «Барқи тоҷик», дар таърихи 24-уми ноябри соли ҷорӣ мизони об 890 метру 71 сантиметрро ташкил дод, ки ин нишондиҳанда дар муқоиса ба ҳамин давраи соли гузашта 3 метру 19 сантиметр камтар буд.

            Тавре аз ширкати «Барқи тоҷик» ба ОИ «Азия-Плюс» хабар доданд, феълан мизони об дар обанбор муодили 886 метр аст, ки дар муқоиса бо нишондиҳандаи ҳамин давраи соли гузашта 2 метр камтар аст. Аз ин бармеояд, ки дар ахири моҳи ноябр сатҳи об 1 метр боло рафтааст. «То оғози соли нав мо бояд ба нишондиҳандаи соли гузашта ноил гардем, - гуфт манбаъ. -Реҷабандии истифодаи барқ ва ба кор даромадани марказҳои барқу гармидиҳӣ имкон медиҳад, ки ин қафомонӣ тадриҷан бартараф карда шавад».

            Ба иттилои манбаъ, феълан ҳаҷми ҷоришавии об ба обанбор чун пештара тақрибан 210-220 метри мукааб дар як сонияро ташкил медиҳад. Зикр гардид, ки дар рӯзҳои таҷлили Иди Қурбон меъёри интиқоли барқ ба аҳолӣ аз ҳисоби барқи нерӯгоҳи Норак зиёд карда шуда, дар ин рӯзҳо ба ҷои 15-17 сантиметри муқаррарӣ 39 сантиметри оби обанбор масраф гардидааст. «Айни замон нерӯи барқ тибқи реҷаи пеш аз ид ҷоришуда интиқол дода мешавад», - афзуд манбаъ.

            Мувофиқи маълумоти ширкат, феълан ҳамарӯза дар ҷумҳурӣ тақрибан 40 млн. кВт/соат нерӯи барқ тавлид гардида, дар як шабонарӯз 6-7 млн. кВт/соат барқи Туркманистон вориди кишвар мегардад.