Душанбе. 11-уми декабр. ОИ «Азия-Плюс» - Дар арафаи соли нави масеҳӣ дар байни мардум овозаи манъ будани ҷашнгирии соли нав дар муассисаҳои томактабӣ ва ибтидоӣ паҳн гашт.

Дар шарҳи ин мавзӯъ сардори Раёсати танзими анъана ва ҷашну маросимҳои Дастгоҳи иҷроияи президенти Тоҷикистон Абдураҳим Холиқов ба ОИ «Азия-Плюс» изҳор дошт, ки тибқи моддаи 83-и Кодекси меҳнати ҷумҳурӣ Соли нави масеҳӣ чун ҷашни давлатӣ таҷлил мегардад ва коргарон дар ин рӯз ҳуқуқи истироҳат доранд.

«Аз ин рӯ, баргузории ҷашнҳои солинавӣ дар корхонаву муассисот ва мактабу кӯдакистонҳо манъ карда нашудааст, вале риояи талаботи Қонуни ҶТ «Дар бораи танзими анъана ва ҷашну маросимҳо дар Ҷумҳурии Тоҷикистон» зарур аст», - гуфт ӯ.

Ёдрас мекунем, ки имсол низ арчаи солинавии пойтахт чун анъана дар майдони «Дӯстӣ» қомат хоҳад афрохт, вале чун солҳои қабл дар ин майдон шоу-чорабиниҳои анъанавии солинавӣ баргузор намешаванд.