Душанбе. 11-уми декабр. ОИ «Азия-Плюс» - Масъалаи таъини Ваколатдор оид ба ҳуқуқи инсон дар Ҷумҳурии Тоҷикистон дар ҳоли ҳаллу фасл қарор дорад.

Тавре мудири шӯъбаи кафолати конституционии ҳуқуқи шаҳрвандони Дастгоҳи иҷроияи президенти ҷумҳурӣ Юсуф Салимов ба рӯзноманигорон хабар дод, феълан ба сарвари давлат номзадҳо ба ин мансабҳо пешниҳод шудаанд ва президент оно мавриди омӯзиш қарор додааст.

Дар ҳамин ҳол, раиси Ҳизби сотсиал-демократии Тоҷикистон Раҳматилло Зойиров изҳор дошт, ки аз ҷониби ӯ лоиҳаи ворид сохтани тағйироту иловаҳо ба Қонуни ҶТ «Дар бораи Ваколатдор оид ба ҳуқуқи инсон дар ҶТ» ва консепсияи рушди минбаъдаи он таҳия гаштааст.

Ба гуфтаи Р.Зойиров, қонуни мазкур аз камбудиҳо орӣ нест, зеро интихобу таъин ва аз вазифа озод кардани ваколатдор аз ҷониби президент нодуруст аст. «Чунин ваколатҳо бояд ба парлумон дода шаванд», - гуфт ӯ.

Раиси ҲСДТ афзуд, ки тартиби аз вазифа озод кардани ваколатдор оид ба ҳуқуқи инсон соддаву осон аст ва аз ин рӯ, ниҳоди мустақили ҷомеаи шаҳрванди шудани он ба гумон аст.