Хуҷанд. 19-уми декабр. ОИ «Азия-Плюс» - То ахири соли ҷорӣ дар шаҳри Хуҷанд корхонаи нави саноатии ҶСК «Нуртекс» оид ба истеҳсоли гипсокартон ифтитоҳ мегардад.

            Тавре мудири шӯъбаи энергетика ва саноати ҳукумати вилояти Суғд Содиқ Рустамов ба ОИ «Азия-Плюс» хабар дод, дар корхона насби таҷҳизоти истеҳсолӣ ба охир расида, маҳсулот дар сохтмони дохили биноҳо истифода бурда мешавад.

            Феълан 60 нафар коргарони ояндаи корхона ба шанбегӣ баромада, гирду атрофи бино ва дохили корхонаро аз партовҳои сохтмонӣ тоза мекунанд.

            Ба гуфтаи коршиносон, дар марҳилаи аввали фаъолият то гирифтани иҷозатнома барои истихроҷи мустақилонаи ашёи хом дар кони маҳаллӣ корхона бо ашёи хоми Исфара кор хоҳад кард.