Душанбе. 24-уми декабр. ОИ «Азия-Плюс» - Чанде қабл консерни «Гурӯҳи ГАЗ» миқдори нахустини авобусҳои навъи «ПАЗ»-ро, ки 20 ададро ташкил медиҳанд, ба шаҳри Душанбе фиристод.

            Тавре хадамоти матбуоти консерн иттилоъ медиҳад, мақомоти шаҳрдории Душанбе ва консерни мазкур дар чаҳорчӯбаи нақшаи таҷдиди муассисаи нақлиёти мусофирбари пойтахт дар бораи харидории 150 автобус аз консерн тавофуқ ҳосил карда буданд ва 130 автобуси боқимонда моҳҳои январ-феврали соли оянда интиқол дода мешаванд.

            Тибқи маълумоти манбаъ, маблағи қарордод ба 4 млн. $ баробар буда, нисфи автобусҳо бо газ ва нисфи дигараш бо сӯзишвории дизелӣ кор мекунанд.

            Қобили зикр аст, ки то ин дам ба пойтахти Тоҷикистон беш аз 200 автобуси бузургҳаҷми навъи «ЛИАЗ – 5256» оварда шуда буданд.