Душанбе. 25-уми декабр. ОИ «Азия-Плюс» - Дар робита ба нотаи сафорати Русия ба Тоҷикистон, ки дар он барои чопи «иттилооти таҳрифомез ва суханони носазо дар бораи раҳбарияти Русия ва сиёсати пешгирифтаи он» аз як қатор нашрияҳои тоҷикзабон интиқод гирифта мешуд, имрӯз дар нишасти матбуотӣ мақомоти раҳбарии рӯзномаҳои «СССР», «Нигоҳ», «Миллат» ва «Фараж» хабар доданд, ки изҳороти муштараке қабул карданд ва ба назари онҳо, дар нота ягон мисол ва истиноди мушаххас ҷой надорад, ки ба он такя шуда бошад

            Нашрияҳои тоҷикӣ санадро «носанҷидаву ғайридипломатӣ ва каммаҳсул» арзёбӣ намуда, изҳор доштанд, ки он «намунаи гӯшношуниди рафтори ғайридипломатии» сафорати Русия дар тамоми муддати фаъолияташ дар Тоҷикистон мебошад.

            Дар изҳорот махсусан таъкид мешавад, ки матни нота ба ҷуз Вазорати умури хориҷии Тоҷикистон, ба ҳамаи васоити ахбори умуми ҷумҳурӣ ва хориҷии муқими кишвар низ фиристода шудааст. «Соли равон вобаста ба чопи матолиб дар ВАО-и Тоҷикистон ба Вазорати умури хориҷӣ беш аз 10 нота ворид гардид, вале ҳеҷ кадоме аз онҳо дар васоити ахбори умум паҳн нагардидаааст», - гуфта мешавад дар изҳорот. Муҳаррирони ҳафтаномаҳо мегӯянд, гузашта аз ин, дар ягон нота дипломатҳо ба изҳороте чун «фиреби ҳадафмандонаи ҷомеаи тоҷик» роҳ надода буданд. Дар изҳорот ҳамчунин омадааст, ки омилҳои зикргардида гувоҳи онанд, ки нотаи сафорати Русия ба ҷуз «чорабинии намоишӣ» дар вазъи то ҳанӯз таъин нагаштани сафир чизи дигаре беш нест.

            Дар идомаи изҳорот баён мегардад: «Мо муносиботи Тоҷикистону Русияро бидуни назардошти ақидаҳои сиёсӣ ва ҳадафи ҳукуматҳо дӯстонаву стратегӣ арзёбӣ менамоему хоҳем кард ва чунин дарки он дар муносибатҳои байнидавлатӣ омили афзалиятнок аст. Аммо дар ҳамин ҳол, мо ба унсурҳои таҳриккунанда ва адоватангези иттилооти ҷойдошта дар муносиботи кишварҳо таваҷҷӯҳ зоҳир месозем ва бечуну чаро дар ин самт Русия ва ВАО-и он афзалият доранд. Дар кадом сатҳ ҷой доштани назорати ВАО-и электронӣ аз ҷониби Русия ба ҳеҷ кас пӯшида нест. Мо умедворем, ки сафорати Русия ба масъалаи мазкур тавааҷҷӯҳ зоҳир намуда, хулосаҳои зарурӣ хоҳад баровард».

            Ёдрас мекунем, ки дирӯз сафорати Русия дар Тоҷикистон унвонии Вазорати умури хориҷии Тоҷикистон номаи эътирозӣ ирсол намуд.

Дар нота, аз ҷумла гуфта шуда буд: «Ахиран дар васоити ахбори умуми Тоҷикистон ба масъалаи вазъи муҳоҷирини меҳнатии тоҷик дар қаламрави Русия таваҷҷӯҳи зиёд зоҳир мегардад. Чун он бевосита ба манфиатҳои Русия дахл дорад, сафорат дар матбуот назари хешро оид ба ин масъала изҳор намуда, ба суолҳои рӯзноманигорон посух гуфта буд, вале чанде аз ВАО шарҳи моро таҳриф сохта, онро мувофиқи табъи худ тағйир додаанд. Бахусус, маводи чопшуда дар рӯзномаи «ФК-capital» бо шарҳи иғвоангез ва таҳқири раҳбарияти сафорат боиси нофаҳмии мо гардид».