Душанбе. 3-юми январ. ОИ «Азия-Плюс» - Нерӯгоҳи «Сангтӯда-1» моҳи март пурра мавриди истифода қарор мегирад.

            Тавре аз мақомоти раҳбарии нерӯгоҳ ба ОИ «Азия-Плюс» хабар доданд, се агрегати мавриди истифода қароргирифта устуворона кор мекунанд ва то ахири соли гузашта дар нерӯгоҳ тақрибан 1 млрд. 97 млн. кВт/соат нерӯи барқ тавлид гаштааст, ки аз нақшаи пешбинишуда ду миллион кВт/соат бештар аст.

            Қобили зикр аст, ки сохтмони нерӯгоҳи мазкур моҳи апрели соли 2005 оғоз гардида, моҳи январи соли 2007 нахустин агрегати он ба истифода дода шуда буд. Мавриди истифода қарор гирифтани агрегати чаҳорум 25-уми феврал ва тамоми зерсохтори заруриву иншооти таъиноти иҷтимоӣ то ахири моҳи марти соли ҷорӣ ба нақша гирифта шудааст.

            Маълумотнома: Нерӯгоҳи обию барқии «Сангтӯда-1» бо ғунҷоиши 670 МВт дар 100 километрии ҷануби шаҳри Душанбе ҷойгир шудааст. Лоиҳаро ба таври муштарак Тоҷикистону Русия амалӣ месозанд. Мувофиқи созишномаи байниҳукуматии Тоҷикистону Русия 75%-и саҳмияҳои нерӯгоҳ ба Русия ва 25%-и он ба Тоҷикистон тааллуқ доранд.