Душанбе. 8-уми январ. ОИ «Азия-Плюс» - Ҳукумати Тоҷикистон Консепсияи аграрии ҷумҳуриро тасдиқ кард.

Тавре аз Вазорати кишоварзии ҷумҳурӣ ба ОИ «Азия-Плюс» хабар доданд, консепсияи мазкур то соли 2020 пешбинӣ шуда, он бо мақсади истифодаи пурмаҳсули захираҳо, ҷойгиркунии оқилонаи истеҳсолоти кишоварзӣ, беҳбуди вазъи таъмини аҳолӣ бо маводи ғизоӣ ва таъмини корхонаҳои саноати бо ашёи хоми кишоварзӣ таҳия гаштааст.

Бино ба иттилои манбаъ, консепсия ба танзими бозори маҳсулоти кишоварзии кишвар, дастгириву дифоъи истеҳсолкунандаи маҳсулоти соҳаи кишоварзӣ ва баланд бардоштани сатҳи некӯаҳволии мардуми деҳоти ҷумҳурӣ мусоидат хоҳад кард. «Дар консепсия ба масоили рушди бахшҳои растанипарварӣ, чорводорӣ, паррандапарварӣ, аспппарварӣ, занбӯриасалпарварӣ, истифодаи оқилонаи захираҳо ва таъмини амнияти ғизоии аҳолии ҷумҳурӣ таваҷҷӯҳи хос зоҳир шудааст», - гуфт манбаъ.

Қобили зикр аст, ки консепсия аз ҷониби Вазорати кишоварзӣ, Академияи улуми кишоварзӣ ва коршиносони беҳтарини соҳаи кишоварзии ҷумҳурӣ таҳия гардид.