Душанбе. 8-уми январ. ОИ «Азия-Плюс» - Яке аз аъзои фаъоли равияи «Салафия» Раҳматуллоҳ Раҳматов дар мусоҳиба бо хабарнигори ОИ «Азия-Плюс» дар мавриди шарҳи қарори имрӯзаи Додгоҳи Олии ҷумҳурӣ дар бораи мамнӯъ эълон кардани фаъолияти равияи «Салафия» дар Тоҷикистон чунин изҳори ақида кард, ки «Салафия» созмон ё ҳаракати мушаххасе нест, ки онро мамнӯъ созӣ, балки танҳо як идеология асту халос.

Р.Раҳматов мегӯяд, мазҳаб ва ақидаҳои динии ӯ хилофи қонуну шариат нестанд. Қобили зикр аст, ки ҳукуматдорони Тоҷикистон қабули қарори мазкурро чун далели ҳифзи сохти конститутсионӣ, таҳкими амнияти миллӣ ва пешгирии сар задани низоъҳои байнимазҳабӣ маънидод мекунанд.

Дар ҳамин ҳол, мавсуф аз он изҳори нигаронӣ кард, ки «паҳн кардани адабиёти христианиро касе манъ намесозад», «исмоилиҳову шиаҳо дар Тоҷикистон ҳуқуқи фаъолият доранд, ҳарчанд дар Ироқ шиаҳо муқобили сунниҳо меҷанганд». «Салафияро бошад, ба рӯйхати ҳаракатҳои мамнӯъ ворид сохтанд», - гуфт ӯ.

Номбурда афзуд, ки минбаъд низ дар чаҳорчӯбаи қонунҳои амалкунандаи Тоҷикистон амал хоҳад кард.