Душанбе. 12-уми январ. ОИ «Азия-Плюс» - Имрӯз дар нишасти хабарӣ раиси Кумитаи ҷавонон, варзиш ва сайёҳии назди ҳукумати Ҷумҳурии Тоҷикистон Маликшо Неъматов изҳор дошт, бозгашти муҳоҷирони меҳнатии тоҷик дар робита ба ҷорӣ сохтани квота барои онҳо дар Русия набояд барои ҷумҳурӣ мушкилот эҷод созад.

Ба гуфтаи ӯ, аввалан, бозгашти умумии аксарияти муҳоҷирон ба мушоҳида намерасад ва дуввум, худи ҷумҳурӣ низ ба коргарони ниёз дорад. «Норасоии қувваи корӣ махсусан дар Вилояти Мухтори Кӯҳистони Бадахшон эҳсос мегардад», - гуфт ӯ.

М.Неъматов мегӯяд, ки ҳарчанд маоши коргарон дар ин ҷо ба Русия баробар набошад ҳам, ба ҳисоби миёна коргарон имкон доранд дар ҳудуди кишвар наздик ба 1,5 ҳазор сомонӣ музди меҳнат ба даст оранд .