Душанбе. 13-уми январ. ОИ «Азия-Плюс» - Комиссияи Аврупо таҳти раёсати Чехия соли 2009-ро соли эҷодиёт ва навовариҳо эълон кард.

            Тавре аз намояндагии Комиссияи Аврупо дар Тоҷикистон ба ОИ «Азия-Плюс» хабар доданд, ҳадаф аз иқдоми мазкур – рушди тарзҳои ҷадиди фаъолият дар бахшҳои гуногуни ҳаёти ҷомеа буда, он ҷиҳати кӯмак барои омода будани Комиссияи Аврупо дар муқобили таҳдидҳои ҷаҳонишавӣ сурат мегирад. Зикр гардид, дар як маросим дар Прага президенти Комиссияи Аврупо Жозе Мануэл Баррозо ва нахуствазири Чехия Мирек Тополанек дар ин хусус изҳорот намудаанд.

            Ба иттилои манбаъ, дар нишасти матбуотии минбаъда оид ба рушди навовариҳо дар Аврупо ҳисобот пешниҳод гардида, таъкид гаштааст, ки сармоягузориҳо ба соҳаи маориф ва зуҳури ақидаронии навоварона бояд дар маркази тавваҷҷӯҳи ҳукуматҳои кишварҳо қарор дошта бошанд.