Душанбе. 17-уми январ. ОИ «Азия-Плюс» - Соли 2008 «Бонки аввалини молиявии хурди Тоҷикистон» дар рӯйхати 100 ниҳоди беҳтарини молиявии хурди ҷаҳон Microfinance Information Exchange, Inc. (MIX) ба мақоми 92-ум сазовор гашт.

            Дар ин хусус дар гузориши MIX 2008 Global 100 Composite ( http :// www . themix . org / ), ки аз миёни 970 сохтори молиявии хурди ҷаҳон 100 ниҳоди беҳтарин интихоб шудаанд, хабар дода мешавад. «Бонки аввалини молиявии хурди Тоҷикистон» нишондоди худро ба 135 зина беҳтар карда, аз мақоми 227-ум дар соли 2007 ба мақоми 92-ум боло рафтааст.

            MIX таъминкунандаи маъруфи хизматгузории иттилоотӣ дар бахши саноати молиявии хурд маҳсуб гардида, тавассути пешниҳоди маълумот шаффофияти фаъолияти ниҳодҳои молиявии хурдро таъмин месозад. MIX оид ба сохторҳои молиявии хурд, сармоягузорон ва хизматгузорҳои ин соҳа дар ҷаҳон маълумоти муфассал пешниҳод менамояд. MIX ширкати ғайритиҷоратӣ буда, аз ҷониби Гурӯҳи Машваратии кӯмак ба камбизоатон таъсис дода шудааст.