Душанбе. 23-уми январ. ОИ «Азия-Плюс» - Имрӯз дар ҷараёни нишасти хабарӣ вазири тандурустии ҷумҳурӣ Нусратулло Салимов изҳор дошт, ки дар Тоҷикистон ба ҷарроҳии иваз намудани гурда шурӯъ мекунанд.

Ба гуфтаи Н.Салимов, чунин навъи ҷарроҳӣ дар бинои 8-уми Маркази миллии тиббӣ, воқеъ дар Қаряи Боло баргузор хоҳад гашт ва барои фаъолияти табибон таҷҳизоти зарурӣ харидорӣ шудааст. «Як гурӯҳи пизишкони ҷумҳурӣ ҷиҳати омӯзиш бо чунин навъи ҷарроҳӣ дар Русия таҷриба андӯхта, гурӯҳи дигар рӯзҳои наздик озими Миср хоҳанд гашт», - гуфт ӯ.

Вазири тандурустӣ зикр кард, ки хешу ақрабо метавонанд узви худро ба бемор пешниҳод созанд. «Агар дар хориҷи кишвар арзиши чунин навъи ҷарроҳӣ 20 ҳазор доллари амрикоиро ташкил диҳад, дар Тоҷикистон он аз 4 ҳазор $ зиёдтар нахоҳад буд», - афзуд Н.Салимов.