Кӯлоб. 28-уми январ. ОИ «Азия-Плюс» - Дар бораи соли ҷорӣ ба Қазоқистон содирот намудани 300 тонна хушкмева аз Ноҳияи Шӯрообод қарордод баста шуд.

            Тавре раиси ноҳия Иброҳим Азизов ба ОИ «Азия-Плюс» хабар дод, акнун, ки қарордоди мушаххас ба имзо расидааст, он ба иҷрои бечунучарои он мусоидат хоҳад кард. «Соли гузашта мо бори нахуст кӯшиш кардем хушкмеваи ноҳияро ба Қазоқистон содирот намоем, вале чун қарордоди мушаххас набуд, аз 300 тоннаи пешбинишуда ҳамагӣ 46 дарсадашро фурӯхта тавонистему халос», - гуфт ӯ.

            Ба гуфтаи раиси ноҳия, иҷрои қарордоди мазкур бо ҷониби Қазоқистон ба дӯши шӯъбаи «Тоҷикматлубот»-и ноҳия вогузор гаштааст.

            И.Азизов афзуд, заминаи густариши номгӯи маҳсулоти содиротӣ дар ноҳия зиёд аст. «Соли гузашта дар ноҳия 7164 тонна меваи гуногун, 713 тонна ҳосили ангур ҷамъоварӣ гардида, боғҳову ангурзорҳои нав ташкил шуданд», - изҳор дошт ӯ.