Душанбе. 28-уми январ. ОИ «Азия-Плюс» - Тарофаҳои ниҳоии нерӯи барқи нерӯгоҳи Сангтӯда-1 пас аз анҷоми пурраи сохтмони иншоот муайян карда мешаванд.

            Тавре дар мулоқот бо рӯзноманигорон муовини аввали вазири энергетика ва саноати ҷумҳурӣ Пӯлод Муҳиддинов хабар дод, феълан нерӯи барқи нерӯгоҳ чун пештара бо арзиши 1,15 сент барои 1 кВт/соат фурӯхта мешавад. «Тарофаҳои нав бо назардошти нархи миёнаи барқ дар ҷумҳурӣ муайян карда мешаванд», - гуфт ӯ.

            Муовини вазир зикр кард, ки мавриди истифода қарор додани агрегати чаҳоруми нерӯгоҳ дар нимсолаи аввали соли ҷорӣ ба нақша гирифта шудааст. Ёдрас мекунем, ки қаблан ба истифода додани агрегати чаҳоруми нерӯгоҳ ахири соли гузашта пешбинӣ гардида буд, вале моҳи ноябри соли 2008 ин мӯҳлат то 25-уми феврали соли ҷорӣ мавқуф гузошта шуда буд.